Dy drejtues automjetesh janë ndëshkuar nga policia pasi u kapën duke zhvilluar gara shpejtësie në magjistralen Pejë–Prishtinë.

Sipas njoftimit të Policia e Kosovës, rasti ka ndodhur më 2 mars 2026, gjatë kontrolleve të rregullta të trafikut rrugor. Patrulla policore ka identifikuar dy shoferë që po rrezikonin seriozisht sigurinë në komunikacion përmes garave të shpejtësisë.

Pas ndalimit dhe procedurave ligjore, njërit drejtues i është shqiptuar fletë-gjobë dhe rasti është proceduar për në Gjykatë.

Drejtuesi tjetër është gjobitur me 500 euro, i janë shqiptuar 5 pikë negative dhe i është vendosur masa mbrojtëse e sekuestrimit të patentë-shoferit për një vit.

Policia ka bërë të ditur se kontrollet do të intensifikohen në të gjitha akset rrugore, me qëllim rritjen e sigurisë dhe parandalimin e aksidenteve.

Autoritetet apelojnë tek të gjithë pjesëmarrësit në trafik që të respektojnë rregullat e qarkullimit, duke theksuar se shkelje të tilla do të trajtohen me zero tolerancë.